ឧត្តមសេនីយ៍ឯក ឌី វិជ្ជា៖ សន្តិសុខឯកជនរួមចំណែកមួយក្នុងការការពារសន្តិសុខសុវត្ថិភាពដល់សង្គម
19-December-2018 | ដោយ ពលមនសិការ
ភ្នំពេញ៖ ឯកឧត្តមឧត្តម សេនីយ៍ឯក ឌី វិជ្ជា អគ្គស្នងការរងនគរបាលជាតិជាតិ និងជាប្រធាននាយកដ្ឋានកណ្តាលសន្តិសុខ មានប្រសាសន៍ថា វិស័យសន្តិសុខឯកជន បានរួមចំណែកមួយក្នុងការថែរក្សា សន្តិសុខ សុវត្ថិភាព និងសណ្តាប់ធ្នាប់ជូនដល់ប្រជាពលរដ្ឋក៏ដូចជាអ្នកវិនិយោគនិងភ្ញៀវទេស ចរណ៍ជាតិនិងអន្តរជាតិខណៈសន្តិសុខឯកជននៅកម្ពុជាបច្ចុប្បន្ន មានជិតបីម៉ឺននាក់ហើយនោះ។
ឯកឧត្តមឧត្តម សេនីយ៍ឯក ឌី វិជ្ជា មានលើកឡើងនៅក្នុងពិធីប្រគល់ និងទទួលរថយន្តដែលជាជំនួយរបស់ភាគីចិន និងបើកកម្មវិធី វគ្គបណ្តុះបណ្តាលស្តីពីការគ្រប់គ្រងសន្តិសុខឯកជនដល់មន្ត្រីនគរបាលជាតិកម្ពុជាពីសំណាក់ ភាគីចិននៅព្រឹកថ្ងៃទី១៩ ខែធ្នូ ឆ្នាំ២០១៨នេះ នៅទីស្តីការក្រសួងមហាផ្ទៃ។
អគ្គស្នងការរងនគរបាលជាតិជាតិ និងជាប្រធាននាយកដ្ឋានកណ្តាលសន្តិសុខ បន្តថាក្រោមការដឹកនាំរបស់រាជរដ្ឋាភិបាលបច្ចុប្បន្នបានធ្វើឲ្យ ប្រទេសជាតិមានសុខសន្តិភាពនិងការអភិវឌ្ឍគួរឲ្យកត់សម្គាល់ ហើយទន្ទឹមនិងនេះក្រុមហ៊ុនសន្តិសុខឯកជន ក៏បានរីកចម្រើនជាបន្តបន្ទាប់ដូច្នេះក៏ត្រូវទាមទារឲ្យមានជំនាញច្បាស់លាស់ក្នុងការគ្រប់គ្រងដើម្បីស៊ីសង្វាក់គ្នា ជាមួយអាជ្ញាធរក្នុងគោលបំណងថែរក្សាសន្តិសុខសណ្តាប់ធ្នាប់ ជូនប្រជាពលរដ្ឋនិងសង្គមឲ្យកាន់តែមានប្រសិទ្ធភាពបន្ថែមទៀតផងដែរ។
ឯកឧត្តមបានបញ្ជាក់ថាកម្ពុជាស្វាគមន៍ចំពោះភាគីចិនដែលបានមកធ្វើបទបង្ហាញស្តីពីការ គ្រប់គ្រងផ្នែកសន្តិសុខ និងចែករំលែកបទពិសោធន៍ដល់មន្ត្រីនគរបាលជាតិកម្ពុជាដើម្បីទទួលបានបទពិសោធន៍បន្ថែមទៀតលើការងារគ្រប់គ្រងសន្តិសុខឯកជននោះ។
សូមរំលឹកថានានពេល បច្ចុប្បន្ននេះភ្នាក់ងារសន្ដិសុខឯកជនទូទាំងប្រទេស មានចំនួន ២៦,៥៦៥នាក់(ស្រី២,៣៨១នាក់)ក្នុងនោះ ក្រុមហ៊ុនផ្ដល់សេវាសន្ដិសុខឯកជន សរុបចំនួន២៣៩ក្រុមហ៊ុន និងសហគ្រាសគ្រឹះស្ថានជ្រើសរើសភ្នាក់ងារសន្ដិសុខឯកជន(មិនធ្វើសេវាសន្ដិសុខឯកជន) មានចំនួន ១,៨៦៧គ្រឹះស្ថាន។
នៅក្នុងកម្មវិធីនោះដែរឯកឧត្តមឧត្តមសេនីយ៍ឯកឌី វិជ្ជា ក៏បានស្នើសុំដល់ភាគីសន្តិសុខ សៀង ហៃ ប្រទេសចិនបន្តជួយបណ្តុះបណ្តាលគ្រូបង្គោលសម្រាប់មន្ត្រីនៃនាយកដ្ឋានគ្រង់គ្រងសន្តិសុខឯកជនកម្ពុជាបន្ថែមទៀតផងដែរ។
លោក ចាវ យានមីង អនុប្រធានប្រតិបត្តិ នៃសមាគមឧស្សាហកម្មសន្តិសុខ សៀង ហៃ បានលើកឡើងថា កម្ពុជាគឺជាមិត្តដ៏ល្អរបស់ចិនហើយចិននៅតែបន្តជួយ ដល់កម្ពុជាជានិច្ច ជាក់ស្តែងដូចការផ្តល់វគ្គបណ្តុះបណ្តាលជំនាញការគ្រប់គ្រងផ្នែកសន្តិសុខ ឯកជននេះជាដើម។
សូមបញ្ជាក់ផងដែរថា ជាមួយគ្នានោះសមាគមឧស្សាហកម្មសន្តិសុខ សៀង ហៃ ក៏បានផ្តល់រថយន្តមួយគ្រឿងដល់នាយកដ្ឋានគ្រប់គ្រងសន្តិសុខឯកជន នៃអគ្គស្នងការនគរបាលជាតិមួយគ្រឿងផងដែរដើម្បីសម្រួលដល់ការងារប្រចាំថ្ងៃរបស់នាយកដ្ឋាន៕
ចំនួនអ្នកទស្សនា
- ថ្ងៃនេះ11711
- ម្សិលមិញ11441
- សប្តាហ៍នេះ41541
- ខែនេះ156691
- ឆ្នាំនេះ156691
- សរុប20599147